Browsed by
Mánuður: febrúar 2012

Katla

Katla

Við erum svo mikið að flýta okkur. Það er svo mikið að gera. Það er líka svo gott að hafa mikið að gera því þá líður tíminn svo hratt. Eins og við séum endalaust að vonast til að komast á leiðarenda. Við steingleymum að njóta augnabliksins. Við gleymum að vera í sambandi við fólkið sem okkur þykir vænt um. Við erum svo upptekin af því sem litlu máli skiptir.

Katla Margrét Ólafsdóttir, litla systir hennar ömmu. Fædd 7. ágúst 1936. Dáin… Það er svo skrítið að tala um fólk sem hefur alltaf verið til staðar, í þátíð. Við hittumst lítið síðustu árin. Ég auðvitað alltaf í útlandinu. Við fengum þó sem betur fer að kveðjast þegar ég var á landinu í janúar. Það var falleg, en óhugnanleg stund. Við vissum bæði að þetta væri síðasta kveðjustundin. Við héldumst í hendur í heila eilífð því við vissum að þegar við slepptum yrði það í síðasta skipti sem við snertumst.

Kona sem ég þekki ekki var í heimsókn. Spurði hver ég væri. Katla kynnti mig og sagðist oft hafa passað mig þegar ég var krakki. Þrátt fyrir að við höfum lítið sést síðustu árin, sá ég væntumþykjuna þegar hún sagði þetta. Eins og hún væri stolt af því að segja frá því hvernig við værum tengd. Mér fannst ég vera svo lítill í hennar lífi, að ég væri einhver aukapersóna, en það var ljóst að svo var ekki. Við getum átt það til að vanmeta tilfinningarnar sem fólk ber til okkar. Kannski er það bara ég.

Ég man eftir skrifstofu í kjallaranum í Kópavoginum þar sem hún bjó með Ásta. Ég fór alltaf þangað niður, því þar var alltaf fullt af pappírsflugvélum frá Flugbjörgunarsveitunum. Ég setti þær saman og lék mér með þær. Ég man eftir myndavélinni sem Ásti átti. Hún var eins og allar hinar, nema að hún spýtti tilbúnum myndum út. Svo voru þau alltaf á hvítum Bens með skrítnum rúðuþurrkum. Barnið hefur lítið vit á bílum, en þessi var spes. Lærði seinna að þetta var S-týpan frá því um 1965-70, eða þar um bil. Ég á svo margar minningar tengdar Kötlu og Ásta, allar góðar. Ég vildi óska þess að ég gæti kvatt hana í hinsta sinn á næstu dögum, en ég á augnablikið í janúar.

Katla mín, hvíl í friði. Þú varst mér meira en ég nokkurn tíma náði að sýna þér.

Framsal Ríkisvalds?

Framsal Ríkisvalds?

Stjórnarskrármálið er orðið að frasa, eins og svo margt annað í íslenskri stjórnsýslu. Síðustu þrjú árin hafa einkennst af klúðri á klúður ofan. Það eina sem núverandi stjórn hefur sér tl málsbóta er að fyrri stjórnir voru enn verri.

Við verðum að fara að klára þetta mál. Koma nýrri stjórnarskrá á koppinn. Eða hvað? Ég hef ekki lesið hana alla. Mun gera það fljótlega, en ég man að þegar ég rann yfir hana á sínum tíma hnaut ég um eina greinina. Trúði varla eigin augum.

111. gr. Framsal ríkisvalds

Heimilt er að gera þjóðréttarsamninga sem fela í sér framsal ríkisvalds til alþjóðlegra stofnana sem Ísland á aðild að í þágu friðar og efnahagssamvinnu. Framsal ríkisvalds skal ávallt vera afturkræft.

Með lögum skal afmarka nánar í hverju framsal ríkisvalds samkvæmt þjóðréttarsamningi felst.

Samþykki Alþingi fullgildingu samnings sem felur í sér framsal ríkisvalds skal ákvörðunin borin undir þjóðaratkvæði til samþykktar eða synjunar. Niðurstaða slíkrar þjóðaratkvæðagreiðslu er bindandi. 

Í fyrsta lagi finnst mér að framsal ríkisvalds megi ekki vera leyfilegt. Viljum við gera það í framtíðinni, ætti að þurfa stjórnarskrárbreytingu. Þessi grein er eins og sérpöntuð af Samfylkingunni svo þau geti komið okkur í ESB tiltölulega vandræðalaust. En skoðum þennan texta.

Okkur er heimilt að framselja ríkisvald alþjóðastofnunum. Við gætum þess vegna gengið NATO á hönd. IMF er alþjóðastofnun, ef maður teygir hugtakið. Hvalveiðiráðið er alþjóðastofnun, sem og Asíubandalagið og NAFTA. Það má ganga að því vísu að hugtakið verði teygt þegar einhver þrýstihópurinn vill tilheyra einhverjum klúbbnum.

Framsal ríkisvalds skal vera afturkræft? Ef við afsölum okkur sjálfstæðinu, höfum við ekkert um það að segja. Við ráðum okkur ekki sjálf. Önnur setning í greininni fellur því um sjálfa sig.

Það má segja að þjóðaratkvæðagreiðsla sé öryggisventillinn, en er það svo? Segjum að Kína vilji innlima Ísland og það sé fólk hér á landi sem hafi áhuga á að koma okkur þar inn. Hversu erfitt verður að snúa þjóðinni? Við erum svo lítil að það þyrfti ekki nema einhverja skiptimynd til að múta okkur. Segjum að Kína byggi glæsilegt sjúkrahús, borgi upp Hörpuna, lofi að borga upp skuldir ríkissjóðs og bora göng í gegn um öll fjöll landsins? Klink fyrir þetta stórveldi. Það er erfitt að standast slíkt boð. Hvað myndi þjóðin kjósa?

Og hverjar eru líkurnar á því að Kína leyfði okkur að öðlast sjálfstæðið aftur, eins og við segjumst eiga rétt á í setningu númer tvö?

111. grein hefur auðvitað ekkert með Kína, IMF eða NATO að gera. Hún er alveg örugglega hönnuð sem farmiði inn í ESB. En hana má misnota á svo marga vegu að ég get ekki stutt nýju stjórnarskrána óbreytta.

Ég vona að dagarnir fjórir í mars verði vel nýttir.

 

Athugasemdir

Ásthildur Cesil Þórðardóttir 26.2.2012 kl. 13:26

Þetta ákvæði verður til þess að ég mun ekki greiða þessu frumvarpi mitt atkvæði. Það eru takmörk fyrir hvað hægt er að bjóða manni, og ég treysti ekki Samfylkingunni né Vinstri Grænum til að fara með þetta vald. Jafnvel þó ljóst sé að þau verða ekki við stjörnvölin eftir næstu kosningar sem betur fer.

Óskráður 26.2.2012 kl. 11:40

Gaman væri að vita hver fékk þetta i gegn í stjórnlagaráði? Ekki það að ég þykist þó vita það! Þessi grein er svo galin að maður verður nánast agndofa, að Íslendingur geti látið sér detta þetta í hug að hafa þetta ákvæði i sinni stjórnarskrá!

Er þetta virkilega eitthvað sem við viljum ganga í?

Er þetta virkilega eitthvað sem við viljum ganga í?

Evrópa er ríkasta svæði í heimi. Þó leggjumst við svo lágt að heimsækja þriðjaheimsríki og biðja um peninga? Kína er á barmi hruns og við mjálmum í þeim að styðja Evrópu í krísunni?

Er ESB gengið af göflunum? Er ekki snefill eftir af sjálfsvirðingui hjá þessu fólki? Skilja þessir „háu herrar“ ekki að ef Kína fer að fjármagna einhverskonar gervibata – því án uppstokkunar kerfisins erum við ekki að leysa neitt – vilja þeir hafa eitthvað um evrópumál að segja? Trúum við virkilega að kínverjar muni hjálpa okkur af því þeir eru svo góðir í sér? Viljum við að ríki sem drepur þegnana án dóms og laga*, leyfir barnaþrælkun og gefur skít í mannréttindi yfirleitt hafi eitthvað með okkur að gera? Viljum við gefa Kína höggstað á okkur?

Svo er þetta skemmtilegt. „Barroso gerði lítið úr mótmælum og verkföllum í einstökum evruríkjum vegna efnahagsástandsins og sagði að það væri réttur fólks að mótmæla í opnum samfélögum.“ Auðvitað gerir hann lítið úr þessu, því Brussel elítunni er skítsama um hvað fólki finnst. Evrópustórnarskráin er gott dæmi. Þegar fólk í nokkrum evrópulöndum hafnaði henni, var nafninu breytt í Lissabonsáttmála og sett í lög. Það þarf nefninlega ekki að kjósa um einhvern sáttmála. Og þegar ekki er hjá kosningum komist, er kosið aftur og aftur þar til rétt niðurstaða fæst. Svo aldrei meir.

Ísland hefur ekkert í þetta samband að sækja. Ekki í bili allavega. Fyrst verðum við að taka til heima hjá okkar, koma efnahaginum í þokkalegt horf. Það getur ekki verið gott að setjast að samningaborðinu með allt niður um sig. Hvernig eigum við að geta samið um nokkurn skapaðan hlut í þeirri stöðu sem við erum nú? Svo er ágætt að bíða átekta þar til róast um evruna og ástandið almennt innan ESB áður en við ákveðum að ganga í sambandið.

ESB er ólýðræðislegt og smáríki hafa sama og engin völd. ESB málið hefur orðið til þess að núverandi stjórn hefur klofnað og ekki komið brýnari málum í verk.

Tökum þessu rólega. Vinnum í okkar málum og fylgjumst með ESB úr fjarlægð. Okkur liggur ekkert á.

* Sjá þessa frétt. Vara við myndum sem geta komið fólki úr jafnvægi. http://barbadosfreepress.wordpress.com/2008/10/03/would-bussa-have-accompanied-barbados-chief-justice-and-prime-minister-to-chinese-embassy-celebration/

Leitin að betra samfélagi.

Leitin að betra samfélagi.

Frá örófi alda hefur mannskepnan reynt að búa til betra samfélag. Við höfum velt fyrir okkur hugmyndum um heiminn, stjórnarfar og tækniframfarir. Við höfum gert okkar besta til að skilja og bæta heiminn. Stundum mistekst okkur og við förum afturabak, stundum heppnast vel til og við lifum í heimi framfara.

Í dag mun enn eitt framboðið líta dagsins ljós. Hvernig eigum við að geta valið í næstu kosningum, ef listinn er lengri en lagarfljótsormurinn? Svarið er tiltölulega einfalt. Það er ekki nóg af framboðum. Ef vel hefði verið á málum haldið, hefði persónukjör verið komið í lög og listinn því verið enn lengri. Eins og málin standa, erum við enn föst með flokka. Við veljum ekki blandið sem fer í pokann. Við veljum þann forpakkaða poka sem okkur lýst best á. Með nýrri stjórnarskrá breytist þetta vonandi.

Með þessu nýja framboði bæstist ekki við fjöldann. Þetta framboð inniheldur Hreyfinguna, sem er með menn á þingi. Það inniheldur Borgarahreyfinguna sem sennilega hefði boðið fram, sem og Frjálslynda Flokkinn. Það hefur því í raun fækkað um tvo lista á næsta kjörseðli. Þetta framboð er líka skemmtilegt að því leyti að það reyðir sig ekki á sterkan foringja. Hver manneskja hefur jafnan tilveru- og tillögurétt. Sé einn meðlimur ósammála öðrum, er það í fínu lagi. Verði þeir báðir á þingi og kjósi þeir ekki eins, er það þeirra réttur. Þeir mega og eiga að fylgja eigin samvisku.

Komandi kosningar munu snúast um ESB, banka,nýja stjórnarskrá og frelsi.
– Eigum við að ganga í ESB? Ég sé enga ástæðu til þess. Mér líkar vel við ESB, bý í því, en sé ekki hvað íslendingar væru að fá út úr aðild. Við þurfum fyrst að taka til heima hja okkur og sjá hvert ESB er að fara. Ég held að allir flokkar verði að hafa skýra stefnu í ESB málum, vilji þeir fá einhver atkvæði.
– Bankarnir fóru á hausinn og drógu okkur með sér. Þeir voru þjóðnýttir og seldir aftur. Nú skila þeir gríðarlegum hagnaði, sem fer nær óskiptur úr landi. Við klúðruðum góðærinu og við klúðruðum hruninu. Ef við tökum okkur ekki á, lærum af mistökunum og förum að lifa á því sem landið gefur, fáum við annað hrun yfir okkur. Við getum talað um festu, ábyrgð eða hvað það var sem Sjálfstæðisflokkurinn sagði korteri fyrir hrun. Við sáum hverju tóm loforð skiluðu okkur. Það sem við þurfum er fólk sem hefur vit á málunum og samvisku sem lætur sig þjóðina varða.
–  Auðlindirnar eru okkar og þær verða að halda áfram að vera okkar. Án fisksins, hreina vatnsins og jarðvarmans, erum við ekkert. Eigum við ekkert. Við megum ekki selja gullgæsina því hún gefur aðeins meira af sér en gulleggin. Við höfum búið í þessu landi í 1100 ár. Við erum ekkert á förum, er það? Við getum nefninlega haft það fínt, en þá verðum við að nýta auðlindirnar sem landið býður upp á. Nýta þær skynsamlega, í þágu þjóðarinnar. Við verðum að hætta að vera skammsýn. Horfum fram á veginn.
– Ef við klúðrum hruninu, ef við náum okkur ekki á strik núna, þá fáum við IMF aftur inn á rúmstokk. Handrukkarinn kemur aftur og bankar uppá. Við megum ekki leyfa því að gerast.

Mannskepnan hefur reynt að byggja upp betra samfélag allt frá því hún fór að kúra í hellum og nota einföld verkfæri. Við höfum reynt að skilja umheiminn, útskyra hvernig hann varð til, hvað hann er. Við erum enn ekki viss, en við höldum leitinni áfram. Í upphafi var frelsið. Fólk vafraði um slétturnar, leitandi að berjum, hnetum og dýrum sem hægt væri að éta. Án frelsis til að nýta hugvitið hefðum við aldrei komist eins langt og við höfum gert. Sé einstaklingnum leyft að vera hann sjálfur, blómstrar hann. Við fundum upp verkfæri, beisluðum eldinn, bjuggum til samfélög, fórum til tunglsins. En við brenndum líka heilu bókasöfnin, jöfnuðum borgir við jörðu, bönnuðum hugmyndir því þær pössuðu ekki við okkar heimsmynd.

Komandi ár verða ár átaka. Annars vegar eru öfl sem vilja hneppa fólk í skuldafangelsi, koma fjármagni á fáar hendur. Öfl sem vilja hefta frelsi á netinu, kynfrelsi, trúfrelsi. Það vill byggja samfélag sem er njörvað niður, fer eftir ströngum reglum. Reglum sem í mörgum tilfellum hefta hugvit og þoka okkur afturábak.

Hins vegar getum við lagt niður verðtrygginguna, eitthvað sem hæglega hefði mátt gera af hverjum sem sat í ríkisstjórn síðustu tuttugu árin. Án skulda erum við frjáls, hneppt í fjötra verðtryggingarinnar erum við fangar. Vandamál heimsins er ekki offjölgun, heldur misjöfn skipti gæðanna. Það er nóg fyrir alla. Netið hefur verið tiltölulega frjálst. Hver sem er getur sett efni á netið og eina ritskoðunin er gleymskan og að hverfa í fjöldann.

Of margar og strangar reglur hefta einstaklinginn. Ég sé ekki hvernig einn hópur fólks getur tekið sér leyfi til að segja öðrum hópi fyrir verkum. Við erum öll viti bornar verur og okkur líður best þegar við getum verið við sjálf.

Öll dýrin eru jöfn. Ekkert dýr er jafnara en annað.

Ég óska hinu nýja framboði til hamingju og óska þeim velfarnaðar.

Glópagull

Glópagull

Efnahagskerfi heimsins hrundi haustið 2008. Ísland og fleiri ríki fundu fyrir því af hörku á meðan sum sluppu tiltölulega vel. En þetta er ekki búið. Dollarinn er veikur, evran riðar til falls. Báðir gjaldmiðlarnir hafa fallið um allavega fjórðung á liðnu ári. Kreppan er ekki búin, því það er ekki verið að ráðast á rót hennar. Ríki heimsins hafa aldrei verið skuldugri en einmitt núna og það sér ekki fyrir endann á lántökunum. Kreppan er rétt að byrja, nema við stokkum kerfið upp. Það er ekki að gerast.

photo 2

Erlendir kaupmenn reyna að hafa eðalmálma af íslendingum. Hér úti í heimi er þetta ekkert öðruvísi. Við höfum fengið sömu auglýsinguna inn um bréfalúguna af og til síðasta árið. Eigið þið gull sem þið viljið selja? Við greiðum hæstu verðin! Gullverð er í hæstu hæðum, en þó vilja þeir sem vitið hafa á þessum málmum ólmir kaupa það. Og borga vel fyrir. Merkileg tímasetning.

Þeir vita nefninlega að ef allt fer sem horfir, verða peningar eins og við þekkjum þá verðlitlir eftir einhver misseri. Þegar stærstu gjaldmiðlar heims riða til falls og ríkisskuldabréf og verðbréf eru of áhættusöm, er öruggast að fjárfesta í alvöru hlutum. Ekki peningunum sem eru bara tölur í tölvu og hafa enga eiginlega merkingu, ekki hlutabréfum sem geta fallið um tugi prósenta á örskömmum tíma. Nei, fasteignir og eðalmálmar eru öruggasta fjárfestingin. Eðalmálmarnir eru bestir, því þeir eru færanlegir.

Það er ekki gott ef menningarverðmæti eru að hverfa úr landi og eru eyðilögð í einhverri bræðslu. En burtséð frá því, er gott að hugsa málið til enda. Ef þeir sem vit hafa á eðalmálmum vilja ólmir kaupa þá þegar verð er í hámarki, ættu viðvörunarbjöllur að hljóma í hausnum á okkur.

Athugasemdir af Moggabloggi

Óskráður 11.2.2012 kl. 21:43

tad er malid Villi tad er fult af folki sem veit kvad er ad gerast tad sem skedi med kronuna a eftir ad ske med alla gervi gjaldmidla ef tu att einkverja aura i banka tagtu ta ut og keifyu gull eda silvur

 

Villi Asgeirsson 11.2.2012 kl. 06:51 Athyglisvert, Helgi. Kemur ekki á óvart að fólk vilji gull ef þetta er að gerast.

Óskráður 10.2.2012 kl. 22:10

Why Is Global Shipping Slowing Down So Dramatically

http://theeconomiccollapseblog.com/archives/why-is-global-shipping-slowing-down-so-dramatically

Óskráður 10.2.2012 kl. 21:59

Fjármálaráðherra Spánar, Luis de Guindos, er mjög ánægður í dag. Spánverjar voru að selja ríkisskuldabref fyrir 2,5 milljarða evra og ásóknin var svo milil að aðeins 1 af hverjum 7 sem vildu kaupa fengu bréf. Sem sagt – Allir vilja lána Spánverjum peninga!

Já, hún er skrítin þessi fréttamennska og ekki vantar skemmdarstarfssemina, sem kemur væntanlega frá USA.

Styður Jésú ritskoðun?

Styður Jésú ritskoðun?

Snorri í Betel er kominn í klandur eina ferðina enn. Hann virðist eiga eitthvað erfitt með að sætta sig við að allir eru ekki eins. Samkynhneigðir mega ekki vera samkynhneigðir í friði fyrir honum.

Hann reyndi að krafsa sig upp úr kviksyndinu á bloggsíðunni sinni. Ég setti inn athugasemd. Eins og oft vill vera með ofurkristið fólk, var hún ekki birt samstundis. Hann hefur ákveðið að athugasemdir skuli fyrst skoðaðar og samþykktar áður en þær birtast. Þar sem ég var ósammála honum, birtist mín ekki.

Snorri mælir í Jésú nafni, segir hann. Ég geri því ráð fyrir að Jésú styðji ritskoðun.

Eigum við þá ekki að láta það eftir Snorra að ritskoða það sem okkur er ekki þóknanlegt? Mér sýnist foreldrum barnanna sem hann kennir ekki vera skemmt. Meirihluti þjóðarinnar er ósammála Snorra, svo það væri rökrétt að birta engar fréttir um hann og hans skoðanir. Þegja hann í hel.

Nei, það er ekki okkar að ákveða hvað fólki finnst og hvernig það lifir sínu lífi. Það er ekki okkar að segja fólki hvaða skoðanir það skal hafa. Fólk eins og Snorri gerir lítið úr kristinni trú, svokölluðum kristilegum kærleik og umburðarlyndi. Helvíti hart ef ég, trúleysinginn, er umburðarlyndari en maður sem mælir í Krists nafni. En hann um það.

Ég get ekki séð að það komi honum við hjá hverjum fólk sefur. Hann má trúa því að hommar fari til helvítis. En mikið væri það gott ef hann héldi þessu rugli fyrir sig og væri ekki að hræða skólakrakka með sögum af vítislogum og guði sem hatar þau.

 

Athugasemdir af Moggablogginu

Villi Asgeirsson 10.2.2012 kl. 18:56

En þetta með að þurfa einhvern guð til að vera ekki algerlega sneyddur réttlætistilfinningu er auðvitað kjaftæði.

Villi Asgeirsson 10.2.2012 kl. 18:53 Mér sýnist á öllu að Jésú hafi verið til, en boðskapur hans hafi verið brenglaður all hroðalega á þriðju öld. Það eru allavega til sannanir fyrir því að Pontíus hafi verið til.

En það skiptir svo sem ekki máli. það sem merkilegast er, er að fullorðið fólk skuli trúa á þetta dæmi. Spurning hvað það segði ef ég færi að boða trú á jólasveininn og skíta á einhverja þjóðfélagshópa sem gætu verið honum vanþóknanlegir.

Anna Sigríður Guðmundsdóttir 10.2.2012 kl. 18:38

Doctor. Jesús var til, og var sönn persóna, eins og allir aðrir sem eru útskúfaðir úr trúarbragða-heimum. En peningaöfga-trúboðar afskræmdu hans persónuleika með því sem kallast trúarbrögð kristninnar.

Trúarbrögð hafa einungis skapað stríð fyrir mannkynið.

Ég hef aldrei lesið biblíu-ævintýra-skáldsöguna, og hef kannski þar af leiðandi náð að halda í mína sönnu trú á það sem er raunverulegt og kærleiksríkt.

Ég þarf sem betur fer engar trúarbragða-ævintýra-sögur til að sinna minni trú á kærleikann til náungans.

M.b.kv.

Óskráður 10.2.2012 kl. 07:58

Hlutverk Jesu var að koma með ógnir um helvíti og eilífar pyntingar til allra sem ekki aðhylltust kristni… Hættið að afsaka gaurinn, ekki tala um hann eins og hann hafi verið góður; Hann var dómsdagsspámaður með ógnir og terror… og það besta, hann var aldrei til… hann er uppskáldaður eins og Harry Potter.. og já, biblian styður ritskoðun á allt sem gagnrýnir hana

Anna Sigríður Guðmundsdóttir 10.2.2012 kl. 00:24

Það er undarlegt að kenna Jesús Jósefsson við jafn mikinn hrylling, eins og fölsk trúarbrögð eru. Enginn hefði verið ósáttari við slíkt, heldur en hann.

Þessi Snorri ætti nú að vinna við eitthvað annað, en að fræða börn. Svona öfga-trúarbragða-dómarar eru með þeim ósköpum gerðir, að umbera ekki náungann, heldur drottna yfir náunganum með óréttlæti og hroka.

Að skreyta sig með trúarbragða-kjaftæði til að upphefja sjálfan sig, og gera sig að dómara yfir náunganum, er álíka og að þurfa orður og titla til að upphefja sjálfan sig úr minnimáttar-kenndinni, og horfa svo niður til þeirra sem ekki þurfa slíkt rusl, sjálfum sér til upphefðar.

M.b.kv.

Ásthildur Cesil Þórðardóttir 9.2.2012 kl. 22:43

Svona lið er algjörlega óþolandi.  Þvílík hræsni, ætli Jésú hefði ekki kallað þennan mann farísea?

Ólafur Björn Ólafsson 9.2.2012 kl. 21:43

Sæll vertu

Mikið svakalega er ég sammála þér núna…

Mitt umburðarlyndi fyrir trúarhópum fer að nálgast endastöð ef þeir fara ekki að hætta þessarri hræsni. Það er hinsvegar gott að hitta á aðra trúleysingja sem hafa umburðarlyndi umfram það sem trúarritin boða.

Kveðja

Kaldi

Hryðjuverk?

Hryðjuverk?

Arion Banki ber fyrir sig hryðjuverkum. Að fái hann ekki að njósna um landsmenn, geti þeir stutt við bakið á hryðjuverkastarfsemi.

Mér hefur sýnst á undanförnum árum að bankarnir, ekki síst þessi, séu að fremja stærsta hryðjuverk sem íslendingar hafa orðið fyrir. Bankarnir tóku stöðu gegn krónunni. Þeir spiluðu fjárhættuspil með fé landsmanna. Þeir settu þjóðina á hausinn og græða nú á tá og fingri.

Maður þarf ekki að sprengja eitthvað í loft upp til að eyðileggja samfélag.

Hafi ég rangt fyrir mér, vil ég endilega heyra það.

 

Athugasemdir af Moggablogginu

Villi Asgeirsson 9.2.2012 kl. 21:08

Hún var ekki þannig, Snorri. En þú hefur svo sem sýnt að dómgreindin er ekki alltaf að flækjast fyrir þér.

Snorri Óskarsson 9.2.2012 kl. 18:39

Ég hendi órökstuddum og ómálefnalegum athugasemdum. Þín var þannig.

k.k.

Snorri

Kolbrún Hilmars 9.2.2012 kl. 17:35

Ég hef grun um að Arion banki fari bókstaflega eftir lögum Alþingis um peningaþvætti. Ekki endilega vegna þess að bankinn sá hafi meiri áhuga á persónunjósnum en hinir bankarnir, heldur að okkar alvitru þingmenn hafa trúlega samþykkt peningaþvættislögin án þess að ráðgast fyrst við persónuvernd.

Bíð spennt eftir að einhver kveiki á perunni hvað varðar samhengið. :)

Gefum vínsölu frjálsa!

Gefum vínsölu frjálsa!

Ég er eiginlega orðlaus, en ætla samt að pikka inn smá færslu.

Á Íslandi er áfengi litið hornauga. Þetta er bölvaldur, bakkus er harður húsbóndi, við drepumst öll úr alkóholisma ef þetta helvíti er ekki bannað!

Ef maður skoðar tölur, kemur eitthvað allt annað í ljós. Samkvæmt AA samtökunum eru hvergi fleiri hjálparhópar á haus en á Íslandi. 800 á milljón, á móti 0.6 í Portúgal, sem er með fæstu hópana. Portúgalar drekka 2 1/2 lítra á móti hverjum lítra okkar íslendinga. Þeir virðast kunna á áfengi, á meðan við gerum það ekki.

En svo ég tali bara af reynslunni. Ég bý í Hollandi. Hér er bjór og léttvín selt í matvöruverslunum. Kassi af bjór kostar u.þ.b. átta evrur. 24x30cl flöskur. Þetta er Heineken, ekki sá ódýrasti. Mig minnir að Lidl selji þýskan bjór, 24x33lc, á fimm evrur. Flaska af rauðvíni frá þremur evrum. Sterk vín eru seld í vínbúðum. Viskíflaskan kostar frá 12-13 evrum og upp. Samkvæmt heimspekilegum vangaveltum lífhræddra íslendinga ættu allir að vera ælandi í ræsinu hér, dauðadrukknir og lagstir í gröfina um fimmtugt. Það er auðvitað fjarstæða. Fólk drekkur meira magn hér en á Íslandi, en það dreyfist yfir vikuna. Bjór eftir vinnu og rauðvínsglas með matnum safnast saman. Íslendingar drekka örlítið minna, en demba öllu í sig á djamminu um helgar. Maður spyr sig, hvort ætli sé verra fyrir heilsuna?

Það er reyndar margsannað að 1-2 glös af rauðvíni á dag er gott fyrir skrokkinn. Það getur komið í veg fyrir hjartakvilla og skerpir hugsun.

Er ekki kominn tími á að íslendingar skríði upp úr holunum sem hræddir bindindismenn grófu fyrir 100 árum? Hættum að væla, hjálpum þeim sem ekki kunna að fara með áfengi og látum hina vera. Njótum þess að fá okkur ískaldan bjór eftir vinnu og gott rauðvinsglas með matnum. Leyfum matvöruverslunum að selja áfengi á eðlilegu verði og njótum lífsins.

 

Athugasemdir af Moggablogginu

Sigurður Hlynur Snæbjörnsson 15.2.2012 kl. 23:33

Það er  búið að okra alla vínmenningu úr Íslendingum með því að hafa  brennivínið svo dýrt frá banni að þeir sem á annað borð drukku dímdu ekki öðru en að þamba það vín sem þeir fengu til að ná öllum áhrifunum í einu.

Hatursáróður bindindispostula og þjónkun heimskra stjórnmálamanna við þá hefur gert þjóðina að illdrykkjuþjóð en ég er viss um að þetta yrði fljótlegt að laga með hressilegum verðlækkunum.

Óskráður 8.2.2012 kl. 12:58

Hljómar eins og Kári sé alki nýkominn úr meðferð, hljómar nákvæmlega þannig.

En það er ljóst að áfengi er eitt hættulegasta eiturlyfið/vímuefnið; Hver sá sem segir annað, þarf að láta athuga hvort hann sé alki í afneitun.,. FACT

Óskráður 8.2.2012 kl. 06:49

Rétt hjá þér Villi og ekki gleyma því að nú fyrir jólin afrekuðu forsjárhyggjumenn það að Nói Síríus hætti að láta vínflöskur í konfektkassa til að egna ekki alkahólista eða börn

Óskráður 7.2.2012 kl. 23:08

Hvers vegna éta hvítu rollurnar meira en þær svörtu?

Hvers vegna deyja fleiri af áfengisneyslu en eiturlyfjum?

Af því að þær/þeir eru fleiri í samfélaginu !

Í öll þau ár, sem ég hef verið á Spáni, hef ég aldrei séð áfengi á heimamanni. Þeir sem vitna í Þjóðverja og Hollendinga hafa sömu reynslu. Það er ekkert að áfenginu sem slíku, heldur þurkuðu þorskhausarnir á Íslandi.

Enda segir Kári – eytur á Íslandi- en vitnar ekki í almennt siðmenntaðar þjóðir.

Óskráður 7.2.2012 kl. 21:47

ó ég er bara pirraður og þreyttur á fólki sem telur sig hafa vit fyrir öðrum.

finnst afar erfitt þegar fólk með varla sýnilegt hvolpavit er að skipta sér af annarra manna málum.

og talandi um stjórnmálamenn, þá hef ég ekki meira álit á þeim erlendu en þeim íslensku.

en , jú, það tekur tíma að þróast frá öpum yfir í menn, það er alveg rétt hjá þér.

Óskráður 7.2.2012 kl. 21:31

Sveinn, ég er einfaldlega að benda á að það getur tekið tíma að aðlagast nýjum háttum. Og ef „fræðslan“ og verðpólitíkin gengur út á bannfæringu vonda voðavonda áfengisins, er ekki hægt að búast við miklum framförum í „vínmenningu“ Íslendinga.

Ekki tel ég þörf á erlendum stjórnmálamönnum á Íslandi. Eða kemur árþúsundavínmenningin sjálfkrafa með þeim?

Óskráður 7.2.2012 kl. 21:11

valgeir, ef íslendingar eru svo miklir blábjánar að þeim hreinlega verður að stjórna.

verðum við þá ekki að ráða erlenda stjórnmálamenn? fyrst íslendingar eru svona miklir blábjánar að þeim verður að stjórna?

Óskráður 7.2.2012 kl. 19:04

Sæll Villi, ég ætlaði að vera þér alveg sammála (og er það í raun!), en bendi á móti að Íslendingar kunna ekki með frelsi að fara. Ef frelsið yrði algjört í verzlun með áfengi væri þjóðin blindfull í tíu ár og þunn næstu hundrað árin. Þær þjóðir sem þú vitnar í hafa árþúsundagamlar hefðir í meðferð áfengis.

Meðan aðaláheyrslan í fræðslunni um skaðsemi áfengis er sett á orð eins og „stórhættulegt“, „manndrepandi“ osfrv. er ekki að búast við að ástandið batni. Fólk þorir ekki að smakka á áfengi í miðri viku (nema leynilega kannski), en um helgar er allt í lagi að sturta í sig þar til slökknar á heilanum.

Áfengisvandamál eru auðvitað líka þekkt í Evrópunni. En hér setja þeir þjáðu ekki sig og fjölskylduna sína fjárhagslega á hausinn með sinni fíkn (sem hægt er að vinna á, áður en gjaldþrotið kemur). Verðpólitík ÁTVR/ríkisins verður að skoða uppá nýtt.

Kveðja frá Þýskalandi 

Sigurður Þór Guðjónsson 7.2.2012 kl. 17:49

Enginn hvatti til að banna áfengi í Þessari klippmynd, aðeins minnt á nokkrar staðreyndir. Vel að merkja: Veldur áfengi engum skaða í Portugal, Hollandi og Þýskalandi? Og það að geta ekki keypt sér léttvín með matnum af mönnum sem væntalega eru ekki alkar finnst mér reyndar vera algjörir smámunir miðað við þjáningu og skaða sem áfengi sannanlega veldur. En auðvitað eru ekki allir alkar. En það er meira mál menn deyja vegna áfengis heldur en sumir, jafnvel margir, geti haft það huggulegt.   

Ásgrímur Hartmannsson 7.2.2012 kl. 17:28

Í Þýskalandi selja þeir Jagermeister á bensínstöðvum.  Við afgreiðzlukassann, ofan á tyggjóinu.

Aldrei sá ég ölvaðan mann í Þýskalandi.

Siðmenningin hefur bara ekki borist hingað – og það er hressilega spornað við henni.

Óskráður 7.2.2012 kl. 17:08

Íslensk forræðishyggja er ákaflega furðulegt fyrirbæri. Alltaf verið að bjarga fólki frá því sjálfu.

Óskráður 7.2.2012 kl. 16:04

Mæltu manna heilastur,,,íslendingar eru algjörir molbúar þegar kemur að vínmenningunni og áfengisdrikkju almennt,,ég hef dvalið mikið í suður-ameríku þar sem áfengi er selt allstaðar,,og þar sér aldrey áfengi á nokkrum manni.Að það skuli ekki vera hægt að kaupa sér léttvín með mattnum hvenær sem er t.d. á sunnudegi er náttúrulega bara fáránlegt,við erum ennþá einsog rollur í rétt að hamstra í helv,,ríkinu,og verðið?

Fari IMF og spillingarpakkið fjandans til!

Fari IMF og spillingarpakkið fjandans til!

Það mátti loka Þjóðleikhúsinu og öðrum menningarstofnunum, en bankarnir skyldu fá sitt? Ef þetta sýnir ekki geðveikina, að peningamafían er á annarri plánetu en við hin, þá veit ég ekki hvað ætti að gera það. Íslendingar byggðu upp menningarlíf sem fáar þjóðir geta státað af. Íslenskar bókmenntir, leiklist, myndlist, tónlist. Er þetta minna virði en peningar?

Pabbastrákarnir fóru í útrás í boði spillingarhunda í embættismannakerfinu. Þeir spiluðu af sér og töpuðu öllu, eins og þeir væru dauðadrukknir unglingar á sóðabar i rauðu hverfi í einhverri hafnarborginni. Svo koma dólgarnir sem notfærðu sér heimsku pabbastrákanna og vaða um allt á skítugum skónum.

Svo heyrum við endalausar fréttir af því hvað IMF (ég segi enn IMF, neita að íslenska nafnið á þessum glæpasamtökum) finnst þjóðir heims eigi að gera. Herða sultarólina. Borga meiri skatta. Skera niður þjónustu. Drepa gamalmenni með því að leyfa því að frjósa í hel, afskiptalaust. Segja okkur að kyngja því að nú er kreppa og að hún er pínulítið okkur að kenna en að feitu grísirnir með bindin séu nú alveg að reyna að bjarga okkur. En taka þeir sjálfir nokkurn tíma ábyrgð? Nei, auðvitað ekki. Þeir setja allt á hausinn, koma svo og sópa allt til sín.

Er ekki komið nóg af arðráni og spillingu. Eins og einhver ímynduð tala á einhverjum bankareikningi, sem eiginlega er ekki til ef maður spáir í það, sé mikilvægari en leikhús, söfn, listir og menning? Þvílík sturlun!

Ég þakka núverandi stjórnvöldum fyrir að hafa þó haldið skítugum IMF krumlunum frá menningarstofnununum sem þjóðin hefur byggt upp á áratugum. Hún má þó eiga það.

 

Athugasemdir af Moggablogginu

Villi Asgeirsson 6.2.2012 kl. 08:16

Jú, það er rétt. Og birta jákvæða frétt um Jóhönnustjórnina. Allavega geri ég ráð fyrir að það hafi verið hún sem sagði hingað og ekki lengra, því Geir var farinn frá snemma á árinu.

hilmar jónsson 6.2.2012 kl. 08:13

Er samt ekki stóra fréttin í þessu að Mogginn skuli vera farin að leita til Fréttablaðsins eftir ferskustu fréttunum ?

Fólk pyntar fólk

Fólk pyntar fólk

Stundum les maður fréttir sem fær blóðið til að sjóða. Pyntingar á börnum er það ógeðslegasta sem hægt er að hugsa sér. Ég vona að Assad og aðrir með jafn viðbjóðslegt innræti mæti þeim örlögum sem þeir eiga skilið.

Því miður er það þó svo að maður er farinn að taka öllum svona fréttum með fyrirvara. Ekki að ég efist um að þetta sé að gerast, að sýrlensk börn séu tekin, brennd með sígarettum, gefið raflost og fleira. Að æsku þeirra sé rænt. Ég efast ekki um að svipaðir hlutir gerist í mörgum löndum, um allan heim. Svona fréttir koma bara svo oft upp vegna þess að vesturlönd vilja fara í stríð við viðkomandi land. Vonum að það sé ekki málið hér.

Þegar yfirvöld standa fyrir morðum og pyntingum, þurfa þau hjálp einstaklinga sem eru tilbúnir til að framkvæma voðaverk sem venjulegt fólk getur ekki ímyndað sér. Þetta gerist yfirleitt í nafni einhvers guðs sem fólk telur gefa sér einhvern rétt til að homa fram við aðra af algerri vanvirðingu því þeir aðhyllast ekki sömu hjátrú. Þetta gerist líka vegna óttans við einhvern leiðtoga. Maður er hlekkur í keðju og þorir ekki að fylgja samviskunni vegna þess að þá eru einhverjir bitlingar teknir af manni, eða að refsingin við að óhlýðnast er samviskunni yfirsterkari. Það er betra að pynta börn, en að eiga það á hættu að lenda á svarta lista yfirvalda. Stundum er það geðveiki sem fær fólk til að pynta og drepa, stundum meðvirkni og stundum ótti.

Bradley Manning á að hafa lekið skjölum sem voru svo birt af Wikileaks. Skjölum sem sýndu að hermenn bandamanna voru ekki alltaf að berjast við vondu kallana fyrir hin góðu öfl. Þau sýndu að hermennirnir okkar, sem við sendum til Íraks, Afganistan og Lýbíu með samþykki okkar, voru kerfisbundið að myrða og pynta óbreytta borgara. Skjölin sýndu að við erum ekki góði kallinn. Við erum nasistarnir sem stilltu fólki upp við vegg og skutum það fyrir minnstu sakir, rómverjarnir sem útrýmdu heilu þorpunum ef þau voru ekki til friðs. Við vorum innrásarherinn og við höguðum okkur þannig. Allt gerðist þetta í okkar nafni, því íslendingar samþykktu þessi stríð.

Hann á að hafa lekið þessum skjölum og var því hnepptur í gæsluvarðhald. Honum var haldið vakandi í 23 tíma á dag, hann fékk ekki að tala við neinn nema lögfræðing, hann fékk enga ábreiðu í pínulitla klefanum. Hann var pyntaður, niðurlægður og brotinn niður andlega. Haldið í þessu ástandi í hálft annað ár án þess að vera ákærður. Pyntaður án dóms og laga.

Bandaríkjamenn hafa reynt að þaga tilvist hans í hel síðan málið kom upp. Fæstir sem ég tala við hafa nokkra hugmynd um hver Bradley Manning er, þaðan af síður af hverju þau ættu að vita af honum. Þegar minnst er á hann í fjölmiðlum, er oft tekið fram að hann sé hommi, eins og til að gera minna úr málinu. Snúa því upp í hálfgert grín, beina umræðunni annað.

Af og til koma svo fréttir sem fá mann til að brosa og trúa á mannkynið.

Í dag tók Hreyfingin stórt skref þegar hún tilnefndi Bradley Manning til friðarverðlauna Nóbels. Hvort hann fái verðlaunin er erfitt að segja, en þetta mun auka umfjöllun um hann í heimspressunni. Fólk mun hugsanlega heyra af honum í fyrsta sinn, skilja af hverju hann hefur verið í haldi án dóms og laga og sjá að heimurinn er ekki endilega eins og okkur er talin trú um. Að við séum ekki endilega góðu kallarnir, að það sé ekki hægt að fara í stríð til að halda friðinn, að ástæðan er ekki að viðhalda mannréttindum og bjarga þjóðum heimsins frá illum einræðisherrum. Að það hangi alltaf eitthvað á spítunni þegar ríki fara í stríð. Kannski að fólk fari að skilja að fyrsta fórnarlamb hverrar styrjaldar er sannleikurinn. Almennir borgara fylgja svo fast á eftir.

Almenningsálitið endaði Víetnam stríðið. Það getur líka endað stíðið við hryðjuverkin ef fólk veit um hvað það snýst. Án þegjandi samkomulags þegnanna, geta ríki ekki farið í stríð. Án hermanna sem tilbúnir eru til að drepa, yrði ansi fámennt á vígvöllunum.

Hreyfingin er lítill flokkur á Íslandi, en í dag hafði hún mikil áhrif á heimsvísu. Hún sýndi að örfáir einstaklingar geta haft mikil áhrif. Að við skiptum öll máli. Ég óska þeim innilega til hamingju.

Visit Us On TwitterVisit Us On FacebookVisit Us On Youtube